ГБУЗ РТ «Противотуберкулезный диспансер»

Республиканың туберкулезка удур диспансерниң девискээринге Тываның күрүнениң ойнаар-кыстар театрының артизи Сайын Монгуш эмнелгеде авазынга юбилейлиг төрүттүнген хүнүн таварыштыр хөгжүмнүг байыр чедирбишаан, коллективи-биле концертти бараалгаткан. Байырланчыг хүн дээнзиг агаар-бойдус безин байыр чедиргензиг онза чылыг хүннү хайырлап, чылыг херелдери-биле чылдып, бойдустуң “белээн” сунган. Артистер алдын күстүң каастааны чараш чурумалынга эмнелгеде кадыын эмнеп чыдар аарыг улуска база эмчи ажылдакчыларынга чараш ырларын сөңнээн.

“С днем рождения”, “Авамга тураскааттым”, “Чалыы назын” болгаш өске-даа чараш ырлар эмнелгениң девискээринге чаңгыланган. Кадыкшылының аайы-биле эмчи черинде эмнедип чыдар улуска бо ышкаш хөгжүмнүг артистерниң көрүлдези оларның сеткил-хөөнүн көдүрүп, хей-аъдын бедидип, кадык апаарынга күзелин улам күштелдирер күштү бээр дээрзи чугаажок.

Артистер аарыг улуска быжыг кадыкшылды база эмнелгениң ажылдакчыларынга быжыг турушту, чедиишкиннерни сеткилинин ханызындан күзээн.